Қазақ тілінің жанашыры әрі Түркі әлемінің ортақ тұлғасы: Асылы Осман жаңа жасқа толды

Қазақстанда мемлекеттік тілдің дамуына, түркі мәдени мұрасының сақталуына және халықтар арасындағы достық байланыстардың нығаюына өлшеусіз үлес қосқан белгілі филолог-ғалым, қоғам қайраткері Асылы Осман туған күнін атап өтуде. Өмір жолын түркі мәдениетін, тілін және ортақ құндылықтарын дәріптеуге арнаған Асылы Әлиқызы – азаматтық қоғамдағы көшбасшылық орнымен, Түркі халықтары мәдениеті қорына қосқан бағалы үлесімен және Қор төрағасы Ахмет Дағдұранның басшылығымен жүзеге асырылып жатқан мәдени жобаларға білдірген қолдауымен Түркі әлемі бірлігінің берік алтын көпірі болып келеді. Сүргін тауқыметінен ғылым шыңына дейін 1941 жылы Грузияның Ахалкалаки өңірінде дүниеге келген Асылы Осман үш жасында, яғни 1944 жылғы депортация саясаты салдарынан отбасымен бірге Қазақстанға қоныс аударды. Балалық әрі жастық шағын Оңтүстік Қазақстанның Түлкібас ауданында өткізген ол білімді өмірінің басты мұраты етіп, Түркістан педагогикалық училищесін, кейін Қазақ мемлекеттік қыздар педагогикалық институтын сәтті тамамдады. Ғылыми жолын ҚазКСР Ғылым академиясының Тіл білімі институтында жалғастырған Асылы Әлиқызы ширек ғасырға жуық уақыт бойы (1969–1993) кіші және аға ғылыми қызметкер болып еңбек етті. Осы кезеңде ол қазақ тіл білімінің іргелі қазынасы саналатын 10 томдық "Қазақ тілінің түсіндірме сөздігі" жобасын дайындауға белсене қатысып, артына өшпес мұра қалдырды. Мемлекеттік саясаттан қоғамдық қызметке дейін Қазақстан тәуелсіздігін алғаннан кейін өзінің мол тәжірибесі мен білімін мемлекеттік қызметке арнаған Асылы Осман ҚР Тіл комитеті мен Ұлт саясаты жөніндегі мемлекеттік комитетте бөлім бастығы, басқарма бастығы лауазымдарын атқарды. Мемлекеттік қызметпен қатар қоғамдық салада да белсенділік танытқан ол: «Мемлекеттік тілге құрмет» қоғамдық бірлестігінің төрайымы, «Мемлекеттік тіл» республикалық қозғалысы төрағасының орынбасары, Қазақстан халқы Ассамблеясының мүшесі, Түркі халықтары мәдениеті қоры аясындағы мәдени бастамалардың белсенді қатысушысы ретінде мемлекеттік тілдің қолданыс аясын кеңейтуге және этностар арасындағы шынайы достық пен ауызбіршілікті нығайтуға мұрындық болды. Мемлекеттік марапаттары мен құрметті атақтары Елге, ғылымға және қоғамдық келісімге қосқан зор үлесі үшін ол жоғары мемлекеттік марапаттар – «Парасат» және II дәрежелі «Достық» ордендерімен марапатталған. Сонымен қатар Алматы қаласының, Алматы облысының және өзі өсіп-өнген Түлкібас ауданының «Құрметті азаматы» атағының иегері. Негізгі ғылыми еңбектері: Етістіктердің лексика-семантикалық және стилистикалық қызметі (1991) Қазақша-түрікше-орысша тілашар (1994) Қазақ тілінің түсіндірме сөздігі (Ұжымдық академиялық еңбек)