Қазақфильм аумағының болашағына қатысты кинематографистерден үндеу

Қазақфильм аумағының болашағына қатысты үндеу жасалды Алматыда Шәкен Айманов атындағы «Қазақфильм» киностудиясының жанындағы 5,5 гектар аумақтың болашағы кино саласының өкілдері қатысқан баспасөз мәслихатында талқыланды. Кинематографистер аталған аумақты тек саябақ ретінде қарастыруға болмайтынын айтып, жоба аясында Қазақстан кино өндірісінің қажеттіліктеріне сай жағдайлардың да сақталуы маңызды екенін атап өтті. Жиында кино түсіруге қажетті техникалық инфрақұрылыммен қатар автотұрақ, арнайы түсірілім көліктері мен өрт сөндіру техникаларының аумаққа кіріп-шығуы және электр инфрақұрылымының маңызы айтылды. Қазақстан Ұлттық кинематографиялық өнер және ғылым академиясының президенті Рашид Нұғманов бұл аумақ қала тұрғындары мен қонақтары үшін де, кинематографистер үшін де тиімді кеңістік болуы қажет екенін айтты. Қазақстан Кино лигасының президенті Айдар Баталов кино түсірілімдерінің қажеттіліктерін ескерудің маңызын атап өтті. Қазақстан Кинематографистер одағының президенті Адай Абельдинов бұл үдеріс кино саласының өкілдерімен ашық диалог негізінде жүргізілуі қажет екенін айтты. Кездесуде кинематографистер 5,5 гектар аумақтың болашағына қатысты шешімдер қабылданған кезде сала өкілдерінің, қала құрылысы мамандарының, қоршаған орта сарапшыларының және жергілікті тұрғындардың пікірлері ескерілуі қажет екенін айтты. Сонымен қатар кино саласының өкілдері Қазақстан Президенті Қасым-Жомарт Тоқаевқа ашық үндеу жасап, аумақты пайдалану мәселесіне қатысты үдерісті қайта қарауды сұрады. Қазақстанның Мәдениет және ақпарат министрлігі «Қазақфильмге» тиесілі жер учаскелері сатылмағанын және киностудияның пайдалануында қалғанын мәлімдеді. Түркі әлемі халықаралық газеті | Алматы