ЭБРУ ӨНЕРІ АТАМЕКЕНІНЕ ҚАЙТА ОРАЛДЫ 🎨 ALMATY HOTEL-ДЕ ЭБРУ ӨНЕРІНІҢ КЕЗДЕСУІ

Түркі халықтары мәдени қорының түркі мәдениеті мен дәстүрлі өнерін таныту, сақтау және келер ұрпаққа жеткізу мақсатында жүзеге асырып келе жатқан мәдени-ағартушылық жобалары аясында Almaty Hotel қонақүйінде эбру өнеріне арналған мәдени шара өтті. Қазақстанға Түркі халықтары мәдени қорының арнайы шақыруымен Түркиядан келген эбру өнерінің маманы Бехие Йылмаз шараға қатысушылармен кездесіп, эбру өнерінің тарихы, мәдени маңызы, қолданылатын материалдар және дәстүрлі орындау тәсілдері туралы кең көлемде таныстырылым жасады. Таныстырылымнан кейін қатысушылар эбру өнерінің орындалу барысын жақыннан көріп, осы дәстүрлі өнердің ерекшеліктерін өз тәжірибесінде байқап көруге мүмкіндік алды. Шараға Түркі халықтары мәдени қорының мүшелерімен қатар Қазақстандағы түрік достары, арнайы шақырылған қонақтар мен өнерсүйер қауым қатысты. Эбру өнері түркі және ислам өнері дәстүрінде ғасырлар бойы дамып, бүгінгі күнге дейін жеткен дәстүрлі өнер түрлерінің бірі болып саналады. Судың бетіне бояулар арқылы түрлі өрнектер түсіріп, оларды арнайы тәсілмен қағазға көшіру арқылы орындалатын эбру өнері өзінің көркемдік ерекшелігімен қатар үлкен шеберлікті, ұқыптылықты және сабырлылықты талап етеді. Түркі халықтары мәдени қоры дәстүрлі өнерді тек өткеннен қалған мұра ретінде емес, бүгінгі күні де дамып, жаңа ұрпаққа үйретілуі тиіс тірі мәдени мұра ретінде қарастырады. Осы бағытта Қор тарапынан эбру өнерін әртүрлі жастағы адамдарға таныстыруға арналған бірқатар жұмыстар жүргізілуде. Бұған дейін колледждерде ұйымдастырылған эбру өнері бойынша шаралардың жалғасы ретінде Almaty Hotel қонақүйінде өткен бұл кездесу де дәстүрлі өнерді кеңінен насихаттауға бағытталды. Сонымен қатар эбру өнері Қордың мәдени және өнер жобалары аясында ұйымдастырылатын Asyl Arman байқауы және басқа да мәдени іс шаралар барысында балалар мен жастарға таныстырылып келеді. Шараның жоғары деңгейде өтуіне қолдау көрсетіп, қонақжайлық танытқаны үшін Almaty Hotel қонақүйінің Бас директоры Таşқын Аднан Курун мырзаға алғысымызды білдіреміз. Түркі халықтары мәдени қорының арнайы шақыруымен Түркиядан Алматыға келіп, өзінің білімі мен тәжірибесін қатысушылармен бөліскен Бехие Йылмаз ханымға да зор алғысымызды білдіреміз. Шараға қатысып, қолдау көрсеткен Түркі халықтары мәдени қорының мүшелеріне, түрік достарымызға, қонақтарға және өнерсүйер қауымға алғысымызды білдіреміз. Түркі халықтары мәдени қоры алдағы уақытта эбру өнеріне бағытталған жұмыстарды одан әрі кеңейтуді жоспарлап отыр. Осы мақсатта Almaty Hotel қонақүйімен бірлесіп Қор аясында эбру өнері бойынша курстар, тәжірибелік шеберлік сабақтары және түрлі мәдени шаралар ұйымдастыру жоспарлануда. Бұл жобалар Түркия мен Қазақстан арасындағы мәдени байланыстарды нығайтуға, дәстүрлі түркі өнерін балалар мен жастарға кеңінен таныстыруға және мәдени мұрамызды келер ұрпаққа жеткізуге бағытталған. Түркі халықтары мәдени қоры ретінде Түркиядан түркі әлеміне дейін созылатын мәдени көпірлерді нығайтып, дәстүрлі өнерімізді Алматыда дәріптеуді жалғастыра береміз. Эбру – судың бетінде басталып, өткеннен болашаққа жалғасатын мәдени жол.