ҚАЗАҚСТАН МЕН ТҮРКИЯ АРАСЫНДАҒЫ БІЛІМ ЖӘНЕ ҒЫЛЫМ САЛАСЫНДАҒЫ ЫНТЫМАҚТАСТЫҚ ТАЛҚЫЛАНДЫ

АЛМАТЫ, 27 қазан 2026 жыл Түркі халықтары мәдени қорының ұйымдастыруымен, Әл-Фараби атындағы Қазақ ұлттық университеті Халықаралық қатынастар факультетінің Дипломатиялық аударма кафедрасымен бірлесіп, «Қазақстан Республикасы мен Түркия Республикасы арасындағы білім және ғылым саласындағы ынтымақтастықтың қазіргі жағдайы мен даму перспективалары» тақырыбында дөңгелек үстел өтті. Алматы қаласында өткен іс-шара барысында Қазақстан мен Түркия арасындағы білім және ғылым саласындағы қазіргі ынтымақтастықтың жағдайы талқыланып, екі елдің жоғары оқу орындары арасындағы байланыстарды одан әрі дамыту, академиялық ынтымақтастықты нығайту және бірлескен ғылыми жобаларды арттыру мәселелері қарастырылды. Дөңгелек үстелге университет оқытушылары, ғалымдар мен студенттер қатысып, екі ел арасындағы білім беру және ғылыми байланыстарды дамыту жөніндегі өз пікірлері мен ұсыныстарын ортаға салды. Студенттердің іс-шараға белсенді қатысуы кездесудің маңызды ерекшеліктерінің бірі болды. Іс-шараның ашылуында Әл-Фараби атындағы Қазақ ұлттық университеті Халықаралық қатынастар факультеті Дипломатиялық аударма кафедрасының меңгерушісі, филология ғылымдарының кандидаты, доцент міндетін атқарушы Марал Қазкенқызы Мурзағалиева сөз сөйледі. Дөңгелек үстелді филология ғылымдарының кандидаты, доцент Сафаура Болатқызы Борибаева жүргізді. Іс-шара барысында Түркі халықтары мәдени қорының президенті, профессор Ахмет Дагдуран да сөз сөйлеп, Қазақстан мен Түркия арасындағы білім, ғылым және мәдени байланыстарды одан әрі нығайтудың маңыздылығына тоқталды. Кездесу барысында білім беру, ғылым, дипломатиялық аударма және академиялық байланыстар бағыттары бойынша баяндамалар жасалды. Қатысушылар екі ел арасындағы ынтымақтастықтың қазіргі деңгейін талқылап, оны жаңа деңгейге көтеруге бағытталған ұсыныстарын білдірді. Дөңгелек үстел барысында студенттердің халықаралық академиялық бағдарламаларға қатысуын кеңейту, университеттер арасындағы ғылыми және білім беру жобаларын дамыту, академиялық алмасу мүмкіндіктерін арттыру және жастардың халықаралық білім беру кеңістігіне белсенді араласуына жағдай жасау мәселелеріне ерекше назар аударылды. Іс-шараның пікірталас бөлімінде қатысушылар өз ойларын ортаға салып, Қазақстан мен Түркия арасындағы білім және ғылым саласындағы ынтымақтастықтың болашағына қатысты пікір алмасты. Кездесу екі ел арасындағы тарихи және мәдени байланыстарды білім мен ғылым саласындағы жаңа жобалар арқылы одан әрі нығайтуға бағытталған маңызды алаңға айналды. Түркі халықтары мәдени қоры Қазақстан, Түркия және жалпы түркі әлемі елдері арасындағы білім, ғылым, мәдениет және академиялық ынтымақтастықты дамытуға бағытталған жұмыстарын жалғастыра береді.